Inauguración do Centro Etnográfico José Rocha

Inauguración do Centro Etnográfico José Rocha

O pasado 13 de agosto inaugurouse o Centro etnográfico José Rocha que ten como principal obxectivo difundir o patrimonio etnográfico de Trabada e da Comarca da Mariña.

 

Asistiron e interviron no acto o presidente da Deputación de Lugo, José Tomé Roca; o fillo predilecto D. Uxío García Amor; Celso Currás López, en representación de seu pai, ex alcalde e fillo adoptivo a título póstumo; Pepe Barro, o deseñador deste centro, o doante da colección, José Rocha e a alcaldesa, Mayra García Bermúdez. 

Este foi un acto moi emotivo, como non pode ser doutro xeito, cando as cousas son feitas con tanto corazón. O nome e, mesmo a súa existencia, débello este museo a José Rocha. Este era o propietario da coleción que neste museo se expón ata que, hai uns anos, decidiu doala en favor do pobo e compartir a riqueza cultural coa que contaba. A bonomía personificada. A inmensa capacidade de dar, ás veces, tan esquecida. 

Xa anos atrás este veciño doara un terreo para construir a Cámara Agraria pero, desta volta, superou o límite da xenerosidade e acudiu ao concello coa única intención de doar a súa colección sen contraprestación algunha, únicamente compartir. 

José Rocha leva décadas coleccionando obxectos e obras antigas de todo tipo, unha labor que continúa na actualidade na que non deixa de facer medrar o seu conxunto e asegura que seguirá ata o seu derradeiro folgo. Con todo este legado e este acto de xenerosidade, hai seis anos, comezou a impulsarse este fermoso proxecto. Tras diversas licitacións e, coa paciencia que require a burocracia e as achegas económicas da administración, hoxe pódese falar de éxito. 

Devagar foise cociñando un dos proxectos máis fermosos que diferencian a Trabada e que nos sitúan no mapa de interese histórico da nosa terra, xa que, o museo conta con pezas que abranguen todo o territorio galego ainda que se potencia, especialmente, o patrimonio material e inmaterial de carácter etnográfico do Concello de Trabada e da comarca da Mariña.

Ademáis, a través de entrevistas, se recadaron as vivencias dos veciños que engadiron, se cadra, aínda máis significado a todo este proxecto.

Sobre el seguiremos falando e moito, namentres, vos xa o podedes visitar se queredes coñecer o verdadeiro corazón e as raíces de Trabada.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies